وألقيت عليك محبة مني | سامح حسين #قطايف

رمضان 2025
#قطايف
وألقيت عليك محبة مني
واحد صاحبي كان عنده إنترفيو في شركة ، وكنت قايله يكلمني بعد ما يخرج عشان يطمني عمل ايه ، أصلي عارفه مبيسترش ..
المهم سألوه ، بتعرف تتكلم انجليزي كويس ؟ قالهم واتكلم انجليزي ليه ، هي الشركة ليها فروع في نيويورك ؟ دا انتو في طلعت حرب ..
قالوله طيب بتعرف تشتغل تحت ضغط ، قالهم آه بس بشتم ..
قالوله طيب ممكن تشتغل أوفر تايم ، قالهم آه بس بحسبن ..
قالوله طب بتغيب كتير ؟ قالهم على حسب ، أنا لسه مش عارف خالي هيموت كام مرة في الشهر ..
قالوله طب عندك خبرات سابقة في الشغل ؟ قالهم ولما انا هجيلكم بخبراتي ، إنتوا هتضيفولي إيه معلش يعنى ..
بس ، وخلص الإنترفيو .. وانا مش هقولك إيه النتيجة ، أنا هسيبك انت تتخيل ..
انت هتتخيل سيناريوهات كتير أوي ، قالوله تمام سيب رقم تليفونك وهنبقى نكلمك ، وطبعا محدش كلمه ولا هيكلمه ..
قالوله انت مرفوض وادوهاله في وشه صايمة .. جابوله الأمن يرميه في الشارع .. أي سيناريو ممكن تتخيله هيكون واقعي إلا سيناريو واحد ، إنهم يقبلوه في الوظيفة عشان صريح واللي في قلبه على لسانه ..
ربنا سبحانه وتعالى وهو بيعد أفضاله على سيدنا موسى قاله حاجة عظيمة أوي قاله : ﴿ وَأَلْقَيْتُ عَلَيْكَ مَحَبَّةً مِّنِّي ﴾
عارف ليه قاله كدا ؟ علشان كل الظروف الطبيعية كانت بتقول ان المنطقي فرعون يكره سيدنا موسى من أول لحظة ، ويقتله كمان ..
أصل واحد معاه نبوءة ان فيه طفل هيتولد وهيقضي على حكمه ، وبدأ بالفعل يقتل كل الأطفال الذكور ، وفجأة لقى البحر جايبله صندوق ، بيفتح الصندوق دا لقى جواه طفل ولد فحبه علطول ، علشان كدا ربنا عدها على سيدنا موسى كمعجزة ، ان المحبة كانت من غير أي سبب ، دي من عند الله ، والمعجزة دي زي ما حضرتك عارف وانا عارف حاجة مبتتكررش كتير ، فمينفعش تراهن عليها ..
كل علاقة بتدخلها في حياتك تقدر تعتبرها وظيفة بتقدم عليها ، لازم تثبت كفاءتك ، وتقدم أحسن ما عندك علشان تتقبل ، محدش مضطر يستحملك بكل عيوبك - اللي انت مش ناوي تصلحها - وحط الجملة دي بين قوسين عشان دي منطقة تلاعب .. هيطلع ألف واحد يقولك اللي بيحبك هيحبك بعيوبك ومزاياك ، دا صح ، إذا كانت العيوب دا قهرية ، متقدرش تغيرها ، أو عيوب بسيطة تعدي ، مش مؤذية يعني ، وإذا كنت انت حاولت كتير تصلح العيوب دي ومقدرتش
لكن عيوبك اللي اخترتها بنفسك ومصمم عليها ، مش من حقك تفرضها على حد ..
علشان حد يحبك بدون أي سبب للحب ، أو بمعنى أصح عشان حد يحب شخص ميتحبش ، دي حالة محتاجة حل من اتنين عشان تتحقق ، يا معجزة ، يا حد عنده خلل في منظومة المشاعر والإدراك ، لكن في الظروف الطبيعية دا مش هيحصل ..
زي ما كل واحد فينا بيجتهد ويشتغل على نفسه وياخد كورسات علشان السي في بتاعه يبقى مليان ويقدر يقنع بيه أي مكان عايز يشتغل فيه ..
برضو محتاجين نشتغل على نفسنا شوية ، علشان سي في شخصياتنا يبقى مقنع للناس اللي بنتعامل معاهم ..
وزي ما المنافسة في سوق العمل شرسة ، المنافسة في سوق العلاقات برضو شرسة ، ومفيش حد مالوش بديل ..
إنسى الحِجّة بتاعة أنا كلامي دبش بس اللي في قلبي على لساني ، يا ريت تخليه في قلبك ياسيدى ومتقولوش لأن دا مش عذر ، من حق الناس اللي بتتعامل معاهم انك متجرحش مشاعر أي حد فيهم بكلمة كدا وللا كدا ..
إنسى حكاية أنا عيني زايغة بس بحبك انتي ، من حق الإنسانة اللي في حياتك إنك تحترم غيابها قبل حضورها ..
يا جماعة أنا عايز أقول إن تصحيح الأخطاء أسهل بكتير أوي من تبريرها ..
الوقت والمجهود اللي بتحتاجهم في كل مرة علشان تبرر عيب في شخصيتك مش عايز تغيره أو خطأ متعود تعمله ، أكبر بكتير من الوقت والمجهود اللي هتشمر فيهم إيدك وتدخل على المشكلة وتتعامل معاها ..
محبة الناس شيء جميل ، نعمة من نعم ربنا ، علشان تَحصُل عليها انت محتاج تجتهد شوية ، محتاج تغير حاجات في نفسك ، أو على الأقل لو مش هتقدر تغيرها ، تعتذر عنها ، وتقدم تعويضات ..
يعني لو مبتعرفش تقول كلام حلو ، اعمل تصرفات حلوة ..
مبتعرفش تواسي ، طبطب .. لو عيبك انك عصبي ، حاول تغيره .. معرفتش تغيره ، اعتذر عنه ..
لكن انك تدور على حد يحبك زي ما انت كدا من غير ما تجتهد ولا تحاول تشتغل على نفسك ، هتبقى عامل زي صاحبي اللي حكيتلك عنه كدا ، مستني الشركة تقبله من غير ما يقدم أي حاجة ..
خليك فاكر ان قلوب الناس زي بيوتها ، لو ناوي تدخلها لازم تحترم حق الضيافة ..
وكل سنة وانتم طيبين ..