الفانوس السحري | سامح حسين #قطايف

#قطايف
رمضان 2025
الفانوس السحري
طول عمري عندي هواية السرحان
بمجرد ما بنفرد بنفسي بدوس على زرار وهمي وادخل العالم السحري بتاعي ، اللي صنعته من خيالاتي واللي أهم ما يميزه انه عالم بلا حدود ، النسخة البريميوم يعني من العالم الحقيقي بتاعي ، بمعنى ان كل اللي مبقدرش احققه في الواقع بحققه ف خيالي ، مرة اتخيل اني بقيت أغنى واحد في العالم ومشغل إيلون ماسك عندي ، ومرة أحلم اني جيبت جون في كاس العالم ، ومرة أحلم انى عزمت الباتشينو على كابيتشينو ..
المهم في يوم قررت الخص كل الأحلام دي في حلم واحد وهو ان يبقى معايه الفانوس السحري ، بمجرد ما اطلب ، المارد هيحققلي كل اللي نفسي فيه ..
ودا كان أجمل أحلامي على الإطلاق ، لأنه فتحلي بوابات لأحلام تانية كتير المارد بتاع الفانوس هيحققهالي .. لحد ما بدأت اتعلق بالفكرة الأسطورية دي واقول يااااه لو تبقى حقيقة .. أنا مش عايز اقولك اني بدأت ادخل على النت ادور على طريقة عمل الفانوس السحري في البيت ..
وبعدين في يوم فكرت قد إيه أنا خيالي ساذج ومحدود ، مش علشان بجري ورا حلم مش هيتحقق ، لكن علشان أنا في إيدي الأحسن منه وسايبه وبجري ورا الخيال .
أنا عندي كنز اسمه الدعاء .. إني أرفع إيدي للسما واقول يا رب .
لو فكرت شوية بس أنا بطلب من مين ، نظرتي للموضوع هتختلف .
أنا بطلب من الغني ، اللي يملك خزاين السماوات والأرض .
بطلب من الكريم ، اللي كل خلية في جسمي وكل نفس بتنفسه جميل من جمايله عليا .
بطلب من اللي محدش غيره هيحب طمعي فيه . يا أخي شوف الأنبيا كانوا بيطلبوا من ربنا ازاي واتعلم منهم ، كانوا بيطلبوا المعجزات والله ، وربنا كان بيديهالهم ، مش علشان هما أنبياء لكن علشان عندهم يقين انه كريم وأي شيء هتطلبه منه مش هيعجزه ، والكتير عندك قليل أوي عنده ..
شوف سيدنا زكريا طلب من ربنا إيه ، طلب يكون عنده ولد وهو طاعن في السن وزوجته عاقر ، يعني أي حد يقولك مستحيل يخلف ، لكن هو ولا فرق معاه الكلام دا ، كان عارف كويس هو بيطلب من مين ، فربنا اداله سيدنا يحيى ..
سيدنا سليمان لما طلب من ربنا قاله إيه ﴿ قَالَ رَبِّ اغْفِرْ لِي وَهَبْ لِي مُلْكًا لَّا يَنبَغِي لِأَحَدٍ مِّن بَعْدِي ۖ إِنَّكَ أَنتَ الْوَهَّابُ ﴾ مقالش كفاية المغفرة لوحدها ، لا دا عايز معاها الملك ، ومقالش أطلب أي ملك وخلاص ، قال ملك لا ينبغي لأحد من بعدي ، ختم كلامه بجملة عظيمة أوي : إنك أنت الوهاب ، الوهاب غير الواهب ، الواهب يديك مرة واحدة ، الوهاب كل ما تطلب منه هتاخد ، وبلا حساب ولا أسباب ..
سيدنا يونس كان في بطن الحوت ، فيه ضلمة وسواد أكتر من كدا ؟ فيه موقف يقولك ان الحياة شطبت أصعب من دا ؟ ومع ذلك دعى ربنا ، فربنا نجاه ..
سيدنا عيسى طلب من ربنا ينزله مائدة من السماء ، ما هي دي معجزة ، سيدنا موسى طلب من ربنا المايه ، استسقى لقومه ، ربنا طلعله المايه من قلب الصخرة .. ما هي دي معجزة
سيدنا إبراهيم طلب من ربنا يوريه ازاي بيحيي الموتى ، ما هي دي معجزة
الأنبياء مكانوش بيستعظموا أي طلب على الله ، ومكانوش بيتكسفوا يطلبوا من ربنا ، كانوا أذكى البشر ، وعارفين انهم قدام كنز مفتوح ، انت بقى مكسوف تدعي ربنا ليه ، متقوليش ذنوبي بقى وبتاع ، والله العظيم ربنا بيدي الطائع والعاصي ، ربنا لو هيعاملك بذنوبك مش هيسيبك على وش الدنيا أصلا ، متتكسفش واطلب ..
ثم إنه هو أصلا اللي أمرنا نطلب منه ﴿ وَإِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ﴾
﴿ وَقَالَ رَبُّكُمُ ادْعُونِي أَسْتَجِبْ لَكُمْ ﴾
الجملة دي أصلا في اللغة العربية اسمها جملة شرطية ، أستجب لكم دا اسمه جواب الشرط ، زي لما تقول ذاكر تنجح كده
دا عرض مفتوح يا باشا .. اطلب هتاخد .. بس ثانية واحدة ، هتاخد اللي انت عايزه ؟ تؤ تؤ .. اللي انت محتاجه ويناسبك .
دا المارد بتاعك هو اللي ممكن يجيبلك اللي انت عايزه ، تقوله عايز أكل ، يجيبلك كل الأكل اللي في الدنيا ، مش مهم بعد كدا تموت بالتخمة .
تقوله عايز قوة يديك قوة مفرطة تدمر بيها نفسك وغيرك .
لكن ربك مبيديش كدا ، ربك كل عطاؤه خير . ومنعه برضه خير .
فيه واحد الفلوس تصلحه ، لو معاه فلوس هيعمل خير ، يديله فلوس ، وفيه واحد تاني الفقر يصلحه ، ويقربه .
فيه واحدة نفسك تتجوزها ، وبتدعي ليل نهار تبقى مراتك ، بس انت شايف تحت رجلك ، لكن ربك ، شايف الأبعد ، شايف ان حياتكم مع بعض هتبقى جحيم .
فيه شركة رايح تعمل فيها إنترڤيو وكل أملك تتقبل كموظف ، وتدعي وتدعي وتدعي ، وتلاقي نفسك اترفضت .. بس مين قالك انك بعد عشر سنين مش هتبقى صاحب الشركة دي ؟ يبقى لازم وانت بتدعي يا باشا يكون عندك ثقة في اللي بتدعيه وبتطلب منه أنه دايما شايلك الخير ، علشان كدا قال بعدها ﴿ فَلْيَسْتَجِيبُوا لِي وَلْيُؤْمِنُوا بِي ﴾
في كل الأحوال احنا عندنا كنز .
ربنا فاتحلنا خزاينه وبيقولنا شيلوا اللي تقدروا عليه .. الخير كتير ومش هيخلص ، اطلب انت بس .
مش هتلاقي حد يكرمك كدا ، ولا هتلاقي حد يعمل معاك اللي ربنا بيعمله معاك .
أطلب منه هو بس من غير ما تشرك معاه الأسباب ، ولح عليه في الطلب .
ادعي دايما دعاء المضطر ، عشان انت فعلا مضطر ، عشان طلبك لو ربنا ما صدقش عليه مش هتطوله ، محدش في الدنيا يقدر يديك حاجة ربنا مش موافق انك تاخدها .
متدعيش ربنا نزاهة ، متدعيش ربنا وانت بتجرب ، متدعيش ربنا تحصيل حاصل .
مفيش مسؤول إنسان زيك يا أخي هيمشيلك خدمة وانت رايح تطلبها منه وحاطط إيدك في جيبك وبتقوله مش فارق معايه أوي طلبي يتنفذ أو لأ ، ما بالك لو بتعمل كدا مع ملك الملوك .
اطلب واتمنى انت في نعمة كبيرة جدا ، انت قدامك منجم خيرات . ماتبخلش على نفسك , وكل سنه وانتم طيبين