الا من اتى الله بقلب سليم | سامح حسين #قطايف

سامح حسين ممثل كوميدي مصري ومن أشهر أعماله مسلسل السيت كوم ( راجل وست ستات ) بدور رمزي الشاب أبن عم عادل ( أشرف عبد الباقي )
وأشتهر بجملته الشهيرة بالمسلسل ( دولة حبيبي ) وأصبح أحد النجوم الأساسيين في نجاح المسلسل. كما قدم سامح حسين الكثير من الأعمال الفنية التي يغلب عليها الطابع الكوميدي مثل ( مسلسل عبودة ماركة مسجلة و مسلسل اللص والكتاب)


رمضان 2025
الحلقة الاولي من #قطايف
إلا من أتى الله بقلب سليم
بيقولك يا سيدي فيه ملك هندي زماااان أوي حب يدي جايزة كبيرة لواحد من الرعية، فحطله تحدي مقابل الجايزة دي، اداله جلابية بيضا طويلة، بس مش بيضا عادي، ناصعة البياض، وقاله خد الجلابية دي يا وحش وروح بيتك، وبكرا الصبح من بدري تضرب الجلابية وتجيلي القصر، لو لقيتها بيضا زي ما سلمتهالك، انت كدا كسبت الجايزة، الراجل قال إيه الرهان السهل دا ؟ الملك دا هندي وللا إيه، ماشي يا مولاي، نجيلك بيها بيضا إيه المشكلة يعني .
روح البيت لقى مراته هتموت وتفتح الشنطة وتعرف إيه اللي فيها، بس هو مش عايز حد يلمس الجلابية، قام قالها ان الشنطة فيها مانجا هندي، ويظهر ان مراته كان عندها فوبيا من المانجا زي الفنان محمد ممدوح فمقربتش من الشنطة..
صحي الراجل من الصبح بدري، لبس الجلابية بتاعته بحذر عشان إيده متبصمش، وخرج من بيته طلع على موقف عبود بتاع الهند، وركب أول ميكروباص، وقعد في آخر كنبة عشان محدش يخبط على كتفه ويقوله خد اتنين من الروبية ..
الست اللي كانت قاعدة جنبه كانت بردانة تقريبا فبدأت تعمل معاه نوش عشان يقفل الشباك، ومع إنه كان حران ومخنوق بس قفلها الشباك واشترى دماغه بدل ما هي تمد ايدها وتقفله بنفسها فتلمس الجلابية ..
وهو ماشي حذر كان فيه واحد فارش فرشة كدا بيبيع عليها تمر هندي، رمى بلاه عليه وقاله انت خبطتلي الفرشة ودلقت التمر، محبش يدخل نفسه في هرتك، قاله يابا أحلى مسا عليك، واداله قرشين تعويض وكمل طريقه ..
وفضل طول الطريق يجنب نفسه حوارات وصراعات مكانش متخيل أصلا انه ممكن يقابلها، كان هدفه الوحيد انه يوصل قصر الملك والجلابية لسه بيضا، كسب الرهان، بس عرف قد إيه الحكاية مكانتش سهلة، وانت كمان أكيد متخيل دلوقتي انها مش سهلة ..
لكن عارف إيه التحدي الأصعب من تحدي الجلابية البيضا دا ؟ التحدي بتاعي انا وانت في الحياة ..
مش أننا نجمع كوينز زي الواد بتاع سابواي، ولا إننا نقعد على أكبر عدد من كراسي السلطة، ولا إننا نحقق أكبر قدر من الإنجازات والمكاسب، كل دا مش مهم صدقني، التحدي الوحيد هو اننا نوصل في آخر الرحلة عند ملك الملوك وقلوبنا بيضا زي ما استلمناها ..
اننا نصون العهدة اللي ربنا إئتمننا عليها ومنبوظش فيها حاجة
" إلا من أتى الله بقلب سليم "
خليك عارف ان كل تحدي خارج التحدي دا هو فخ بتنصبهولك الحياة، وتوريطة بتدخلك فيها عشان توسخلك قلبك ..
المنصب اللي مستعد تدفع عمرك كله عشان توصله، الفلوس اللي عايش عشان تستفها وترصها، العيال اللي فنيت حياتك ليهم .. ملفات الانتقام اللي مالية ادراج عقلك، والناس اللي عايز تثبتلهم حاجات، وسباقات الخيل اللي بتجريها وتراهن فيها على نفسك..
كلها اشتغالات يا صاحبي الهدف منها ان جلابيتك تتوسخ فتخسر السبق الكبير ..
سيب الناس يطحنوا بعض في ماتشات الدنيا وعدي انت بعهدتك سليمة، ومتتهزش لو ضحكوا عليك يومين، لأنك بعد كدا هتضحك عليهم لأبد الآبدين، وكل سنة وانت طيب ..

يمكنكم متابعة أخبار وأعمال سامح حسين الفنية من خلال القناة الرسمية :https://bit.ly/2ZKGV99